«Տեսա՞ր, որ չես կարողանում հարցը լուծել բնակցային տրամաբանությամբ, թողնեիր՝ գնայիր». Սևակ Հակոբյան

Լրագրող. խմբագիր Սևակ Հակոբյանի ֆեյսբուքյան գրառումը՝ կից տեսանյութով. «Տեսա՞ր չես կարողանում հարցը լուծել այնպես, որ շարունակվի բանակցային տրամաբանությունը, որ Արցախը մնա հայկական, անկախության գործընթացն ավարտվի միջազգային ճանաչմամբ, թողնեիր՝ գնայիր, ասեիր՝ էս իմ խելքի բանը չէ։
Հարցն այն է, որ անգամ 2020 թվականի պատերազմից հետո, երբ Արցախի ավելի քան 70 տոկոսը հանձնել էր, ռուսական կողմը կարողացել էր հասնել մի իրավիճակի, որ Արցախի կարգավիճակը ոնց կա, էնպես մնա, հարցի կարգավորումը թողնեն հետագային։ Պուտինն էլ է ասել, Լավրովն էլ է ասել, որ առաջարկում էին Արցախի հետագա ճակատագրի քննարկումները թողնել հետագային, սերունդներին։ Այդ ժամանակ հայկական շահը դա էր պահանջում։
Արևմտյան «բարեկամները», սակայն, տարան Պրահա, նստեցրին սեղանի կողքը ու ասացին՝ դավայ-դավայ, դե շուտ արա, ինչ Ալիևն ուզում է՝ տուր։ Ինչպես որ հրաժարվել էր պատերազմը կանգնեցնելու՝ Պուտինի առաջարկից, այնպես էլ հրաժարվում է Արցախի հարցի կարգավորումը հետագային թողնելու առաջարկից։ Տպավորությունս է, որ կոնկրետ ուզում էր ելքը լինի Արցախի լրիվ հանձնումը։ Մակրոնի, Միշելի, Ալիևի հետ գնաց-նստեց-հանձնեց, մաքրվեց-պրծավ, իր համար գլխացվավանքից ազատվեց։
2019-ի հունիսին ներկայացված բանակցային փաստաթղթում ամրագրված էր, որ ԼՂ ժողովուրդը կարող է որոշել իր ապագա իրավական կարգավիճակը հանրաքվեով։ Բայց Հայաստանի կողմից բանակցողը կամ ավելի ճիշտ է ասելը՝ չբանակցողը, որոշում է, որ ի՛նքը պետք է որոշի, ի՞նչ ժողովուրդ, ժողովուրդն ո՞վ է, որ որոշում կայացնի։ Ալիևի հետ, Միշելի ու Մակրոնի հետ հանգիստ նստում-որոշում են հանձնել՝ ժողովրդի փոխարեն»: