Ռուբիոն ներկայացրել է Ուկրաինայի հարցով բանակցությունների վիճելի կետը

ԱՄՆ պետքարտուղար Մարկո Ռուբիոն նշել է, որ տարածքներն ուկրաինական հակամարտության կարգավորման բանակցություններում հիմնական վիճելի կետերից մեկն են։ Այս մասին նա հայտնել է Fox News-ին տված հարցազրույցում։

«Այն, ինչի համար նրանք հիմա բառացիորեն վիճում են, մոտ 30-50 կիլոմետր տարածք է և Դոնեցկի շրջանի 20 տոկոսը (որն Ուկրաինայի վերահսկողության տակ է- խմբ․)։ Այն, ինչ մենք փորձել ենք անել, և կարծում եմ՝ որոշակի առաջընթաց ենք գրանցել, դա պարզելն է, թե ինչը կարող են ընդունել ուկրաինացիները, որը նրանց անվտանգության երաշխիքներ կտա ապագայի համար»,- նշել է նա։

«Սրանց մասին է խոսքը՝ դադարեցնել պատերազմը, համոզվել, որ նրանք այլևս երբեք հարձակման չեն ենթարկվի, պաշտպանել Ուկրաինայի երկարատև և երկարաժամկետ ինքնիշխանությունն ու անկախությունը, որպեսզի նրանք չդառնան խամաճիկ պետություն. նրանք իրականում անկախ և ինքնիշխան են... և թույլ տալ, որ նրանց տնտեսությունը ոչ միայն վերականգնվի, այլև բարգավաճի: Ահա թե ինչի ենք մենք փորձում հասնել այստեղ»,- հավելել է Ռուբիոն: