Հայաստանի ծանրամարտի հավաքականը վերադարձավ աշխարհի առաջնությունից

Գիշերը Հայաստանի ծանրամարտի հավաքականը Նորվեգիայից վերադարձել է Երևան, նրանց մեծ շուքով դիմավորել են «Զարթնոց» օդանավակայանում։
Հիշեցնենք՝ Վարազդատ Լալայանը դարձել է աշխարհի չեմպիոն։ Նա ոսկե մեդալակիր է դարձել գերծանր քաշային մարզիկների պայքարում՝ պոկելով 206 կգ ու 211 կգ: Հրում վարժությունում նա բարձրացրել է 245 կգ, 250 կգ: Լալայանն այս վարժությունում ևս առաջինն է եղել։
Երկամարտի 461 կգ արդյունքով՝ Վարազդատ Լալայանը երկրորդ տարին անընդմեջ աշխարհի չեմպիոն է:
Աշխարհի առաջնության 110 կգ քաշային կարգում Հայաստանի հավաքականի անդամ Գարիկ Կարապետյանը պոկում վարժությունում բարձրացրել է 187 կգ: Այս վարժությունում մեր ծանրորդը դարձել է բրոնզե մեդալակիր: Հրում վարժությունում Կարապետյանը բարձրացրել է 220 կգ: Երկամարտի 407 կգ արդյունքով՝ Գարիկ Կարապետյանն աշխարհի առաջնությունում 4-րդն է:
Հայաստանի ընտրանու անդամ Սիմոն Մարտիրոսյանը պոկում վարժությունում անհաջող է մասնակցել: Նա չի բարձրացրել 185 կգ ու 187 կգ: Մարտիրոսյանը չի մասնակցել հրում վարժությանը: