Ովքե՞ր են կազմակերպել Հայաստան-Պորտուգալիա խաղի տոմսերի վաճառքն ու ի՞նչ կապ ունեն Մելիքբեկյանի հետ. «Ժողովուրդ»

«Ժողովուրդ» օրաթերթը գրում է. «Վերջերս Հայաստանում գրեթե ոչ մի մեծ միջոցառում առանց վայրիվերումների չի անցնում՝ սկսած Սնուփ Դոգից մինչև ֆուտբոլի խաղեր։
Օգոստոսի 14-ին ՀՖՖ-ն հայտարարեց սեպտեմբերի 6-ին սպասվող Հայաստան-Պորտուգալիա խաղի տոմսերի վաճառքի մեկնարկի մասին, սակայն կայքը տեխնիկական խնդիրներ ունեցավ։
Որոշ ժամանակ անց Ֆեդերացիան հայտարարեց, որ արդեն վաճառվել է 2500 տոմս, բայց կայքը տեխնիկական խնդիրներ ունի և անհասանելի է, ինչից մեկ ժամ անց էլ ՀՖՖ-ն հայտարարեց, որ տոմս գնելու համար ժամը 14:00-ից գործելու է հերթագրման համակարգ։ Այս համակարգի գործարկումից հետո համակարգի գործունեությունը խաթարվեց. տոմս գնել փորձող քաղաքացիների էկրաններին հայտնվող վահանակը հուշում էր՝ «տոմսերն արդեն սպառված են»։
Ֆուտբոլասերները դժգոհության մեծ ալիք բարձրացրին, քանի որ նրանցից որևէ մեկը տոմս չէր գնել։ Տոմսերը աստղաբաշխական գներով սկսեցին վաճառվել համացանցում՝ ֆեյսբուքյան խմբերում, List.am-ում, փակ խմբերում: 1000 դրամանոց մեկ տոմսը կարող էր վաճառվել 50 անգամ թանկ արժեքով։

Տոմսերի վաճառքի պաշտոնական մեկնարկից առաջ, ըստ երևույթին՝ արտասահմանյան անհայտ ծագման մի կայք, տոմսերը վաճառում էր ընդհուպ 1000 դոլարով։

Այս խառնաշփոթի միակ մեղավորը Հայաստանի ֆուտբոլի ֆեդերացիան է՝ Արմեն Մելիքբեկյանի գլխավորությամբ։

Ըստ «Ժողովուրդ» օրաթերթի տեղեկությունների՝ Հայաստան-Պորտուգալիա խաղի տոմսերի վաճառքն իրականացնողները Մելիքբեկյանի հետ փոխկապակցված անձինք են, ավելի կոնկրետ՝ նրա բարեկամներն են։

Այս առիթով «Ժողովուրդ» օրաթերթը հարցմամբ դիմեց ՀՖՖ՝ որպես լրագրողական էթիկայի դրսևորում՝ շանս տալու մեկնաբանել տեղեկությունը։ Ֆեդերացիայից փորձել էինք ճշտել՝ ո՞վ է զբաղվում Հայաստան-Պորտուգալիա խաղի տոմսերի վաճառքով, ո՞ր ընկերությունը և ի՞նչ առնչություն (ընկերական, բարեկամական) ունեն ՀՖՖ-ի անունից տոմսեր վաճառողները Արմեն Մելիքբեկյանի հետ։
Ֆեդերացիայից, ի պատասխան, ստացել էինք հետևյալը. «Հայտնում ենք, որ Հայաստան-Պորտուգալիա խաղի տոմսերը վաճառվել են www.tickets.ffa.am կայքում, որի աշխատանքները պատվիրակվել է «Արևակ» ՍՊԸ-ին, իսկ երկրորդ հարցի մասով, այն է՝ թե ի՞նչ առնչություն ունեն ՀՖՖ-ի անունից տոմսեր վաճառողները Արմեն Մելիքբեկյանի հետ՝ տեղեկացնում ենք, որ ՀՖՖ-ի անունից տոմսեր վաճառողները որևէ առնչություն չունեն «Հայաստանի ֆուտբոլի ֆեդերացիա» ՀԿ-ի և ՀՖՖ նախագահ Արմեն Մելիքբեկյանի հետ»,- ասված էր հարցման պատասխանում։

Թեև ֆեդերացիան չի հաստատում, սակայն կարծես թե ամենաթողություն է տիրում նաև այս համակարգում»։

Մանրամասները՝ թերթի համարում: