Էրդողանն ու Փեզեշքիանը հեռախոսազրույց են ունեցել

Իսրայելի և Իրանի միջև լարվածության սրման ֆոնին Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Իրանի նախագահ Մասուդ Փեզեշքիանի հետ, հայտնում են իրանական լրատվամիջոցները: Հեռախոսազրույցի ընթացքում Թուրքիայի նախագահը նշել է, որ Իսրայելի հարձակումներն «ուղղված են ամբողջ տարածաշրջանը կրակի մեջ ներքաշելուն»։

Էրդողանի խոսքով՝ Իսրայելը փորձում է նաև «շեղել աշխարհի ուշադրությունը Գազայի հատվածում տիրող իրավիճակից և սաբոտաժի ենթարկել միջուկային բանակցությունները»։

Ավելի վաղ Էրդողանը զրուցել է նաև Սաուդյան Արաբիայի, Հորդանանի և Եգիպտոսի առաջնորդների հետ։ Գործընկերների հետ զրույցում Էրդողանն Իսրայելին անվանել է «Մերձավոր Արևելքի կայունության և անվտանգության համար ամենամեծ սպառնալիքը»։

Թուրքիայի նախագահի խոսքով՝ Իրան-Իսրայել նոր պատերազմը «կարող է անօրինական միգրացիայի ալիքներ հրահրել տարածաշրջանի բոլոր երկրներում: Էրդողանը նշել է, որ միջուկային խնդիրը կարող է լուծվել միայն շարունակական բանակցությունների միջոցով։