Գրացի դպրոցում կրակոցների հետևանքով 28 վիրավորներից 4-ի վիճակը ծայրահեղ ծանր է

Ավստրիայի Գրաց քաղաքի դպրոցում տեղի ունեցած կրակոցներից հետո առնվազն 28 մարդ հոսպիտալացվել է, որոնցից շատերը ծանր վիճակում են։ Այս մասին հաղորդում է Kronen Zeitung թերթը։

Թերթն առնվազն 4 տուժածի վիճակը բնութագրում է որպես ծայրահեղ ծանր, նրանցից մի քանիսը գլխի շրջանում ստացել են հրազենային վիրավորումներ։

Հիշեցնենք, որ Գրացի դպրոցում նախճիրը տեղի է ունեցել երեքշաբթի առավոտյան։ Զոհերի թվի վերաբերյալ տվյալները դեռևս տարբեր են։ Ավստրիական լրատվամիջոցները հաղորդում են 10 զոհի մասին, այդ թվում՝ կրակողը, մինչդեռ նախկինում գրել էին, որ զոհվել է 11 մարդ։ Լրատվամիջոցները նաև տարբեր տեղեկություններ են տրամադրում նրա ինքնության մասին. ոմանք նրան անվանում են դպրոցի աշակերտ, մյուսները՝ նախկին աշակերտ։ Կրակողի գործողությունների դրդապատճառները դեռևս պարզված չեն, ենթադրաբար, կրակողն իրեն համարել է ծաղրի զոհ։