Կաննի փառատոնի փակման օրը Ֆրանսիայի հարավը մնացել է առանց էլեկտրականության

Կաննի 78-րդ կինոփառատոնի փակման օրը՝ մայիսի 24-ի առավոտյան, Ֆրանսիայի հարավում էլեկտրամատակարարումը մասամբ դադարեցվել է։

Le Monde պարբերականը գրում է, որ էլեկտրաէներգիայի անջատման հետևանքով առանց լույսի է մնացել շուրջ 160 հազար տուն, այդ թվում՝ Կաննի որոշ հատվածներ, երբ փառատոնի կազմակերպիչները նախապատրաստվում էին «Ոսկե արմավենու ճյուղի» հանձնման արարողությանը։

Ֆրանսիական ազգային էներգետիկ օպերատոր RTE-ն հայտնել է, որ անջատման պատճառ է դարձել երկու խոշոր միջադեպ․ գիշերը հրդեհ էր բռնկվել բարձրավոլտ ենթակայանում, իսկ մի քանի ժամ անց էլեկտրահաղորդման գծի հենակետ է շուռ եկել Սեն Կասիեն լճի շրջանում։

RTE-ն չի բացառում, որ հրդեհը կարող էր լինել կանխամտածված գործողությունների արդյունք։