Վիճաբանություն, ծեծկռտուք, դանակահարություն և վրաերթ` Կոտայքում

Այսօր՝ մայիսի 8-ին, վիճաբանություն, ծեծկռտուք, դանակահարություն և վրաերթ է տեղի ունեցել Կոտայքի մարզում՝ ժամը 16:50-ի սահմաններում։

Ոստիկանները հայտնաբերել են արնանման հետքեր, քարեր, որոնց վրա նույնպես առկա է արյուն, վթարված «Toyota Camry» մակնիշի ավտոմեքենա:

Ավելի ուշ օպերատիվ տեղեկություններ են ստացվել, որ Subaru մակնիշի ավտոմեքենայով վիրավորի են տեղափոխել «Աբովյան» բժշկական կենտրոն:

Քրեական և համայնքային ոստիկանների մի խումբ ժամանել է հիվանդանոց և բակում հայտնաբերել Subaru մակնիշի ավտոմեքենա, որի վրա առկա են եղել արնանման հետքեր, առջևի աջակողմյան հատվածը՝ վնասված, դիմապակին՝ ճաքած:
Ըստ օպերատիվ տեղեկությունների՝ Subaru-ի վարորդը, որին դանակահարել են, նշված ավտոմեքենայով վրաերթի է ենթարկել իրեն դանակահարածին: Այդ տեղեկությունը քրեական և համայնքային ոստիկանները պարզում են:

Ըստ հավաքվածների՝ վիրավորներից մեկը Աբովյանում հայտնի «Սալդատ» մականվամբ ինչ-որ անձնավորություն է, որը մշտապես քրեական պատմությունների կիզակետում է եղել։