«Հոսանքի տատանումների հետևանքով բազմաթիվ բնակիչների կենցաղային տեխնիկան փչացել է». Գառնիկ Դանիելյան

«Բազմաթիվ քաղաքացիներ են ինձ դիմել, որ հոսանքի տատանումների հետևանքով իրենց կենցաղային տեխնիկան վնասվել է, մարդիկ հայտնվել են անորոշ վիճակում: Որտե՞ղ դիմեն, եթե, օրինակ, ՀԷՑ-ը հրաժարվի փոխհատուցումից»,- դիմելով Հանրային ծառայությունները կարգավորող հանձնաժողովի նախագահ Մեսրոպ Մեսրոպյանին՝ հարցրեց ընդդիմադիր պատգամավոր Գառնիկ Դանիելյանը: Մեսրոպյանն ասաց, որ հաճախ հանդիպող խնդիր է. հարցն ունի երկու բաղադրիչ. «Առաջին, որ իսկապես ՀԷՑ-ի մեղքով է, երկրորդը՝ բնակարանի էլեկտրական սնուցման, մոնտաժի սխալի հետևանքով, կամ տանտիրոջ անփույթ շահագործման: Երբ նման բողոք ենք ստանում, տվյալ հասցեատիրոջ հետ կապված հարցն ուղղում ենք ՀԷՑ-ին, վերջիններս կապվում են քաղաքացու հետ ու փորձում ճշգրտել՝ իրենց մեղքով է եղել, թե ոչ: Պրոցեսի բարդությունն էդ կետում է, որ երբեմն վեճը շարունակվում է»: