«Պետք է քննարկել ու դասեր քաղել, այլ ոչ` վերցնել մի դրվագ ու դարձնել դրոշակ». Թաթուլ Հակոբյան

Լրագրող Հակոբ Բադալյանի ֆեյսբուքյան գրառումը․ «Վերջին օրերին Ֆեյսբուքի Հայկական Հանրապետությունում քննարկվող հիմնական հարցը հետևյալն է՝ Լևոն Տեր-Պետրոսյանը Արցախը ճանաչե՞լ է Ադրբեջանի մաս 1991-ին և բանակցային գործընթացքում, թե՞ դա արել է Նիկոլ Փաշինյանը 2022 թվականին:
Իմ կարծիքով, Արցախում մեր կրած պարտության պատճառները պետք է փնտրել, քննարկել և վերլուծել առաջին հերթին:
Օրինակ, ես մեր պատմությունը, լինի երրորդ Հանրապետությունը, Խորհրդային Հայաստանը կամ Առաջին Հանրապետությունը, դիտում եմ մեկ միասնական ընթացքի մեջ:
Ինձ համար, օրինակ, ոչ այնքան էական է, թեև անշուշտ կարևոր, թե ինչպես 1920 թվականի մայիսին Դրոն, Նժդեհը, Արսեն Միքայելյաննն ու Դմիտրի Միրիմանյանը Արցախում իշխանությունը փոխանցեցին հայ բոլշևիկներին, անուղղակի կերպով՝ ռուս բոլշևիկներին ու Խորհրդային Ադրբեջանին, այլ այն, թե ինչ գործողություններ ու սխալներ էինք արել մինչ այդ, որ կորցրեցինք Արցախը:
Նույնը՝ Կարսի կորստի դեպքում 1920-ի հոկտեմբերին:
Նույնը՝ 44-օրյա պատերազմի դեպքում 2020թ սեպտեմբեր-նոյեմբերին:
Նույնը՝ Արցախի հայաթափման դեպքում 2023 սեպտեմբերին:
Թե չէ կպել ենք 1991-ի Ալմաթիին ու վերջ:
Ալմաթիից հետո եղել է հաղթանակ, ստատուս-քվո, երկար տարիների բանակցային գործընթաց և պարտություն: Այս ամենը պետք է քննարկել ու հասկանալ, դասեր քաղել, այլ ոչ վերցնել մի դրվագ ու դարձնել դրոշակ»: