«ԼՂ հակամարտության հարցում ՌԴ համեստ պահվածքն Ադրբեջանին թույլ տվեց պատերազմ սանձազերծել»․ Զատուլին

Ադրբեջանը շահում է Ռուսաստանի հետ շփումներից՝ ոչ միայն տնտեսական, այլ նաև քաղաքական առումով։ Այս մասին «Свободная Пресса»-ին տված հարցազրույցում ասել է ՌԴ Պետդումայի պատգամավոր, ԱՊՀ երկրների ինստիտուտի ղեկավար Կոնստանտին Զատուլինը։

«Լեռնային Ղարաբաղի հակամարտության ժամանակ մեր համեստ պահվածքն Ալիևին թույլ տվեց 2023 թվականին ռազմական գործողություն իրականացնել այնտեղ: Իսկ հիմա Բաքվում ընթանում է գերեվարված ԼՂ նախկին ղեկավարների դատավարությունը», ասել է Զատուլինը:

Խոսելով Ադրբեջանի իշխանությունների քաղաքականության մասին, պատգամավորը նշել է, որ Ադրբեջանը խաղում է սեփական խաղը, միևնույն ժամանակ՝ հանդիսանալով թուրքական ազդեցության խողովակ։

«Բաքվի համար դաշնակցային հարաբերություններն Անկարայի հետ առաջնահերթություն են՝ համեմատած Մոսկվայի հետ»,- նշել է պատգամավորը՝ հավելելով, որ

Ադրբեջանն իսկապես ցանկանում է գոհացնել Արևմուտքին և, մասնավորապես, Մեծ Բրիտանիային, որն այս տարածաշրջանում տեղի ունեցող իրադարձությունների ավանդական մասնակիցն է, ինչպես նաև ամերիկյան նոր վարչակազմին: