Ադրբեջանը Ռուսաստանի դեմ հայց կներկայացնի միջազգային դատարան՝ AZAL ինքնաթիռի կործանման գործով

Ադրբեջանն ապացույցներ է հավաքում AZAL ինքնաթիռի կործանման գործով միջազգային դատարան դիմելու համար, հայտնում են ադրբեջանական լրատվամիջոցները։

Ադրբեջանն իր ձեռքի տակ ունի «Панцирь-С» հրթիռների բեկորներ, որոնցով խոցվել է ինքնաթիռը։ Ձևավորվում է ապացույցների բազա, հավաքվում են փաստեր և ապացույցներ, նախապատրաստական ​​աշխատանքներ են տարվում միջազգային դատարան դիմելու համար։

«Այնուամենայնիվ, Ռուսաստանի հետ երկխոսության դռները բաց են մնում: Մոսկվան պետք է բացահայտ ընդունի իր մեղքը և պատասխանատվություն ստանձնի, հակառակ դեպքում Բաքուն պատրաստ է հաջորդ քայլերին», գրում է qafqazinfo.az-ը:

Հիշեցնենք, որ 2024 թվականի դեկտեմբերի 25-ին Ղազախստանի Ակտաու օդանավակայանի մոտ վթարի էր ենթարկվել AZAL-ին պատկանող մարդատար ինքնաթիռը։ Աղետի հետևանքով զոհվել է 38, վիրավորվել՝ 29 մարդ։