«Փակ դռների հետևում մեզ կոչ էին անում ՌԴ-ի դեմ երկրորդ ճակատ բացել»․ Կոբախիձե

Վրաստանի իշխանությունները հերթական անգամ հայտարարել են, որ ուկրաինական պատերազմի սկզբում իրենց կոչ են արել երկրորդ ճակատ բացել Ռուսաստանի դեմ։ Այս մասին հայտարարել է երկրի վարչապետ Իրակլի Կոբախիձեն։
«Մեզ ասում էին, որ Ուկրաինան հաղթում է պատերազմում, և դուք չպետք է բաց թողնեք այս հնարավորությունը»,- ասել է վարչապետը՝ չհստակեցնելով, թե կոնկրետ ով է առաջարկել պատերազմ սկսել ՌԴ-ի հետ։

«Փակ դռների հետևում մեզ կոչ էին անում երկրորդ ճակատ բացել»,- հայտարարել է Կոբախիձեն:

Վրաստանի վարչապետը նշել է նաև, որ ԱՄՆ նախագահ Դոնալդ Թրամփի և «Վրացական երազանքի» դիրքորոշումները համընկնում են։

«Այն, ինչի մասին մենք խոսում էինք երեք տարի շարունակ, և ինչի համար մեզ հռչակեցին ռուսամետ և հակաարևմտամետ, ԱՄՆ-ի նոր կառավարությունը կրկնում է մեկը մյուսի հետևից: Դա վերաբերում է նաև Ուկրաինայի վերաբերյալ մեր հայտարարություններին»,- ասել է Վրաստանի վարչապետը։