«Գնամ Եռաբլուր ի՞նչ անեմ, ասեմ՝ հորդ դատեցին»․ Աստղիկ Գալեյան

Այսօր դատարանը՝ դատավոր Մասիս Մելքոնյանի նախագահությամբ, որոշում կայացրեց 44-օրյա պատերազմում զոհված Մխիթար Գալեյանի հորը՝ Գարիկ Գալեյանին պատժել 2 տարի ազատազրկմամբ, միաժամանակ որոշվեց անմիջապես փոխել խափանման միջոցն ու նրան ուղարկել 3 ամսյա տնային կալանքի։ Գալեյանի համար վերջնական պատիժ մնաց 1 տարի 6 ամիս ժամկետը:
«Գնամ Եռաբլուր ի՞նչ անեմ, ասեմ՝ հորդ դատեցին»,-լրագրողների հետ զրույցում ասաց Գարիկ Գալեյանի կինը՝ Աստղիկ Գալեյանը։
Փաստաբան Վահան Հովհաննիսյանի խոսքով այս ամենը կատարվում է ի ցույց զոհվածների ծնողների՝ նրանց լռեցնելու նպատակով։ Նրա խոսքով վճիռը բողոքարկվելու է։
Հիշեցնենք, որ 2023 թ. սեպտեմբերի 8-ին հայտնի էր դարձել, որ Գալեյանը ձերբակալվել է։ Ավելի ուշ Քննչական կոմիտեն հայտնել էր, որ նրա մոտ 3 փաթեթ մարիխուանա է հայտնաբերվել։ Գալեյանի դեմ նախաձեռնվել է քրեական վարույթ ՀՀ քրեական օրենսգրքի 393-րդ հոդվածի 1-ին մասի հատկանիշներով։ Այն միացվել է ավելի վաղ Գալեյանի առնչությամբ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 195-րդ հոդվածի 2-րդ մասի 5-րդ կետով և 297-րդ հոդվածի 2-րդ մասի 1-ին կետով նախաձեռնված քրեական վարույթին։