Բայդենը Գազայում հրադադարի վերաբերյալ ուղերձ է տարածել

Գազայի հատվածում հրադադարի համաձայնագրի առաջին փուլը կտևի վեց շաբաթ, որի ընթացքում կսկսվի պատանդների ազատ արձակման և անկլավից իսրայելական զորքերի դուրսբերման գործընթացը։ Այս մասին ԱՄՆ-ի նախագահ Ջո Բայդենը հայտարարել է հատուկ ուղերձի ժամանակ։

«Առաջին փուլը կտևի վեց շաբաթ: Այն ներառում է ամբողջական և վերջնական զինադադար, իսրայելական զորքերի դուրսբերում Գազայի բոլոր բնակեցված շրջաններից և մի շարք պատանդների ազատ արձակում ՀԱՄԱՍ-ի կողմից՝ ներառյալ կանայք, ծերերը և վիրավորները»,- ասել է Բայդենը:

Ըստ Բայդենի, երկրորդ փուլը ներառում է բոլոր պատանդների ազատման և զորքերի դուրսբերման գործընթացի ավարտը, իսկ երրորդ փուլի իրականացման ընթացքում զոհված պատանդների աճյունները կվերադարձվեն իրենց ընտանիքներին, որից հետո կսկսվի անկլավի վերականգնման գործընթացը։ Հրադադարը կգործի բոլոր երեք փուլերում։