Կրակոցներ՝ Սեբաստիա-Լենինգրադյան փողոցների խաչմերուկում

Հունվարի 2-ին ժամը 17։40-ի սահմաններում ՀՀ ներքին գործերի նախարարության ոստիկանության քրեական ոստիկանության գլխավոր վարչության Երևան քաղաքի վարչությունում օպերատիվ տեղեկություններ են ստացվել, որ Սեբաստիա-Լենինգրադյան փողոցների խաչմերուկում «Mercedes» մակնիշի ավտոմեքենայի միջից կրակոցներ են արձակել։

Ինչպես հայտնում է Գագիկ Շամշյանը, ՀՀ ՆԳՆ ոստիկանության օպերատիվ կառավարման կենտրոն էլ ահազանգ է ստացվում քաղաքացու կողմից, ով հայտնում է, որ «Mercedes» մակնիշի ավտոմեքենայի վարորդը ոչ ադեկվատ վիճակում ավտոմեքենան վարում է, իսկ վարորդի կողքի ուղևորը իր մոտ եղած ատրճանակից կրակոցներ է արձակում օդ և այդ «Mercedes»-ն ու այլ ավտոմեքենաներ իրար վրա են քշում։

Ոստիկանները հայտնաբերել են ավտոմեքենան ու վարորդին՝ Երևանի 44-ամյա բնակիչ Գագիկ Հ.-ին, ում խուլիգանություն կատարելու կասկածանքով ձերբակալել են:

Ձեռնարկվում են անհրաժեշտ գործողություններ՝ մյուս անձի ինքնությունը ճշտելու, նրան և հանցագործության գործիք ատրճանակը հայտնաբերելու ուղղությամբ: