«Փաշինյանական իշխանության համար հպարտ քաղաքացին լավ էլ տուգանքի մատերիալ է»․ Մհեր Մելքոնյան

ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը՝ կից տեսանյութով․ «Ժամանակին Փաշինյան Նիկոլն ի լուր աշխարհի հայտարարեց, որ Հայաստանի Հանրապետության քաղաքացին տուգանքի «մատերիալ» չէ։
Սակայն իրականունյությունն ամբողջովին հակառակը ցույց տվեց։
Պարզվեց, որ փաշինյանական իշխանության համար հպարտ քաղաքացին լավ էլ տուգանքի մատերիալ է։
Ահազանգ ստացա․ Երեկոյան ոստիկանները կանգնեցրել են Շիրակի մարզի Աշոցք խոշորացված համայնքի բնակիչներից մեկի մեքենան և փոխանցել, որ նրան պետք է վարչական տուգանքի ենթարկեն։ Պատճառը՝ իբր ոչ սպանդանոցային ծագում ունեցող մսի իրացումն էր։
Քաղաքացու խոսքերով, անասուններին հարկադիր մորթի էր ենթարկել, քանի որ ֆինանսական խնդիրներ ուներ։
Այսօր կրկին այցելել եմ Աշոցքի թղթի վրա գոյություն ունեցող սպանդանոցը։
Եվս մեկ անգամ արձանագրեցի, որ սպանդանոցը չի գործում։
Այս պարագայում, երբ Շիրակի մարզում չկան գործող սպանդանոցներ և քաղաքացիներին դարձնել տուգանքի մատերիալ ոչ սպանդանոցային մորթ իրականացնելու համար՝ առնվազն անբարոյականություն է ։
Նիկոլական իշխանության արատավոր շրջանը շարունակվում է»։