«Արցախում պաշտպանության կարիք ունեցող հուշարձանների ցանկ ենք ներկայացրել, բայց մինչև հիմա պատասխան չկա»․ Լեռնիկ Հովհաննիսյան

ԱԺ-ում ընթանում է «Բաքուն ոչնչացնում է Արցախի պատմամշակութային ժառանգությունը» թեմայով քննարկումը, որին մասնակցում են Արցախի խորհրդարանի և մշակույթի ներկայացուցիչներ, ԵԱՀԿ Մինսկի խմբի անդամ երկրների դեսպանների ներկայացուցիչներ, Հայաստանում ՄԱԿ-ի գրասենյակի ներկայացուցիչը։

Արցախի թեմի թեմական խորհրդի ատենապետ Լեռնիկ Հովհաննիսյանը ներկայացրեց Ադրբեջանի կողմից Արցախում ոչնչացված և ոչնչացվող պատմամշակութային ժառանգությունը։ Նա նշեց․ «Մեր կողմից կազմվել է անհապաղ պաշտպանության կարիք ունեցող 151 հուշարձանների ցանկ և ներկայացվել ԿԳՄՍ նախարարություն։ Իրենք էլ պետք է ուղարկեին ԱԳՆ, այնտեղից էլ ՅՈՒՆԵՍԿՕ-ի համապատասխան հանձնաժողովներ՝ քննարկելու։ Բայց մինչև հիմա տեղեկություն չունենք՝ այդ գործընթացը եղե՞լ է։ Կարծես թե պետական կառավարման այս երկու գերատեսչությունների միջև կապը այնքան էլ լավ չի, որովհետև ԿԳՄՍ-ի հետ կարողանում ենք աշխատել, ներկայացնում ենք, բայց գնում է ԱԳՆ, իսկ թե այնտեղ ինչ է լինում, արդեն մեզ անհայտ է»։