«Ավինյանի քաղաքապետության դեմ պայքարի նոր ալիք կձևավորվի». Բաբկեն Հարությունյան

«Հայրենիք» կուսակցության անդամ Բաբկեն Հարությունյանի ֆեյսբուքյան գրառումը. «Ավինյանի քաղաքապետության դեմ պայքարի նոր ալիք կձևավորվի։
Անցկացված սոցհարցումների համաձայն Տիգրան Ավինյանի հրաժարականն են պահանջում հարցվածների 50%-ը, նրա պաշտոնավարմանը կողմ են 30%-ը, իսկ 20%-ը հրաժարվել է պատասխանել։ Ընդ որում, Ավինյանի վարկանիշը ցածր է նույնիսկ իր նշանակած գրեթե բոլոր թաղապետերի վարկանիշից։
Երևանցիների 53%-ը դժգոհ է Երևանում նոր շինթույլտվությունների տրամադրման գործընթացից։ Վստահաբար, ավելի շատ դժգոհություն կլինի նաև նորակառույց շենքերի ավարտական ակտերի և շահագործման թույլտվությունների ուշացումների մասով, քանի որ կառուցապատողները քաղաքապետարանի հետ պասերով տարիներով ուշացնում են շենքերը բնակիչներին հանձնելու գործընթացը՝ պատճառելով մեծ ֆինանսական վնասներ բնակարան գնած քաղաքացիներին։
Իհարկե, ապօրինի հողազավթումների և ավտոտնակների դեմ պայքարը, ցածրորակ բարեկարգումները և այլ բազմաթիվ խնդիրներ չեն կարող չնկատվել և անհետևանք մնալ քաղաքացիների մոտ, հետևաբար, առաջիկայում ի հայտ կգան դժգոհությունները գեներացնող նոր պրոցեսներ»։