«Ռադիո Սպուտնիկ»-ի ղեկավարն ափսոսանք է հայտնել. Վիշինսկու նամակը՝ ՀՌՀ նախագահին

Ռուսաստանի և Հայաստանի լրագրողներն ու հասարակական գործիչները պատասխանատվություն են կրում երկու երկրների միջև բարեկամության և դաշնակցային հարաբերությունների մթնոլորտի պահպանման համար: Այս մասին ասված է Հայաստանի Հանրապետության հեռուստատեսության և ռադիոյի հանձնաժողովի նախագահ Տիգրան Հակոբյանին ուղղված՝ «Ռադիո Սպուտնիկ»-ի գլխավոր խմբագիր Կիրիլ Վիշինսկու նամակում:

Հայաստանի Հանրապետության հեռուստատեսության և ռադիոյի հանձնաժողովի ղեկավարին ուղղված նամակում Կիրիլ Վիշինսկին ափսոսանք է հայտնել, որ ավելի վաղ՝ 2023 թվականի աշնանը, կայանի եթերում «հնչել են արմատական արտահայտություններ, որոնք ակնհայտորեն հակասում են «Ռադիո Սպուտնիկ»-ի խմբագրական քաղաքականությանը»։

Կայանի գլխավոր խմբագիրն ընդգծել է, որ «Սպուտնիկ» ռադիոն որպես իր առաքելություն է տեսնում արտասահմանյան լսարանին ներկայացնել Ռուսաստանի՝ որպես ուժեղ և բարեկամ տերության արդար կերպարը՝ բարի մտադրություններով:

Վիշինսկին նաև նշել է, որ Հայաստանի մեդիա տարածքում Ռուսաստանի և նրա ղեկավարության նկատմամբ, մեղմ ասած, ոչ կոռեկտության օրինակները նույնպես այնքան էլ քիչ չեն»: «Ռադիո Սպուտնիկ»-ի գլխավոր խմբագրի խոսքով՝ «հարյուր հազարավոր հայերի շրջանում, որոնք Ռուսաստանի քաղաքացիներ են և որոնց համար Հայաստանը փոքր հայրենիք է, իսկ նրա մեդիատարածքն՝ ամենօրյա հետաքրքրության առարկա է, նման բաները չեն կարող դժգոհություն չառաջացնել»:

Ռադիոյի գլխավոր խմբագիրը վստահություն է հայտնել, որ իր նամակով սպառվել է եթերում հնչած արմատական արտահայտությունների պատճառով առաջացած տհաճությունը: «Հուսով եմ, որ «Տոսպա» ռադիոյի հետ մեր աշխատանքի շարունակությունը ռուս-հայկական արդյունավետ համագործակցության օրինակ կլինի»,-եզրափակել է նա:

Հիշեցնենք, որ Հայաստանի հեռուստատեսության և ռադիոյի հանձնաժողովը 2023 թվականի դեկտեմբերի 20-ին 30 օրով կասեցրել Է «Սպուտնիկ Արմենիա» ռադիոյի վերահեռարձակող «Տոսպա» ռադիոընկերության լիցենզիան: Պատճառը «Ուրբաթը Տիգրան Քեոսայանի հետ» ուղիղ եթերի հաղորդման ժամանակ ՀՀ վարչապետի հասցեին հնչած կտրուկ արտահայտություններն են: