«Քաղաքացիներն ահազանգում են Վերին Լարսում առաջացած հերթերի մասին». ԱԺ պատգամավոր

ԱԺ «Հայաստան» խմբակցության պատգամավոր Գառնիկ Դանիելյանը գրառում է կատարել ֆեյսբուքյան իր էջում. «Քաղաքացիներից ահազանգում են Վերին Լարսի անցակետում կրկին առաջացած հերթերի և խնդիրների մասին։
Հայտնում են, որ օրեր շարունակ ստիպված են լինում սպասել, իսկ երբ հերթը հասնում է, մանրամասն զննելու, բեռնատարները դատարկելու արդյունքում խախտվում են ծիրանի պահման պայմանները և այն անպիտան է դառնում։
Ստացվում է, որ գոյացող հերթերի արդյունքում ծիրանը սկսում է փչանալ, և ֆերմերները ահռելի վնասներ են կրում։
Հերթերը պայմանավորված են այն հանգամանքով, որ վերջին օրերին ծխախոտի ապօրինի արտահանման փորձեր են արվում։
Կոչ եմ անում պատկան մարմիններին առավելագույն զգոնություն ցուցաբերել՝ կանխելով, պատժելով և բացառելով նման դեպքերը։
Գյուղմթերքը այս սեզոնին պետք է արտահանվի առանց լրացուցիչ խոչընդոտների»: