Նոր ուժգին երկրաշարժ՝ Աֆղանստանում. զոհերի թիվն աճում է

Պակիստանում և Աֆղանստանում երեկ երեկոյան ուժեղ երկրաշարժ է տեղի ունեցել. այսօր առավոտյան զոհերի թիվը հասել է 13-ի։

The News-ը՝ վկայակոչելով Աղետների կառավարման գրասենյակին, գրում է 9 զոհի և 44 վիրավորի մասին։ 6,8 մագնիտուդ ուժգնությամբ երկրաշարժը տևել է առնվազն 30 վայրկյան և խուճապ է առաջացրել։ ԱՄՆ Երկրաբանական ծառայության տվյալներով՝ երկրաշարժը տեղի է ունեցել Աֆղանստանի հյուսիս-արևելքում. օջախը գտնվել է 187 կիլոմետր խորության վրա։

Reuters-ը, վկայակոչելով Պակիստանի ոստիկանությանը, հայտնում է, որ Սվաթ թաղամասում տուժել է մոտ 150 մարդ։

Առնվազն չորս մարդ է զոհվել և 50-ը վիրավորվել Աֆղանստանում, հայտնել է երկրի առողջապահության նախարարության պաշտոնյան։