Ռուսական գնդակոծությունների հետևանքով այրվել է Ուկրաինայի ամենամեծ փայտե տաճարը

Ռուս զինվորականների նախօրեին գնդակոծել են Դոնեցկի մարզում գտնվող Մոսկվայի պատրիարքարանի Սվյատոգորսկի տաճարը։ Արդյունքում հրդեհվել է փայտե շինությունը։ Այրվող եկեղեցու լուսանկարը հրապարակել է 95-րդ առանձին օդային հարձակման բրիգադի սպա Յուրի Կոչևենկոն։ Նշենք, որ տաճարը կառուցվել էր խորհրդային տարիներին պայթեցված հին եկեղեցու տարածքում՝ 1992-ին և ամենամեծ փայտե եկեղեցին էր Ուկրաինայում:

Մոսկվայի պատրիարքարանի ուկրաինական ուղղափառ եկեղեցին հաստատել է ռուսական հարձակման փաստը տաճարի վրա. «Ռազմական գործողությունների արդյունքում լայնածավալ հրդեհ է բռնկվել Սուրբ Վերափոխման Սվյատոգորսկի Ամենայն Սրբերի տաճարի տարածքում։ Վանքի գլխավոր տաճարն ամբողջությամբ այրվել է»։

Հունիսի 1-ին ուկրաինական լրատվամիջոցները հայտնել են, որ Ռուսաստանը գնդակոծել է Սվյատոգորսկի Լավրան, ինչի հետևանքով զոհվել են երկու վանականներ և միանձնուհի։ Եվս հինգ մարդ ծանր վնասվածքներ է ստացել։ Ծանր վիրավորներից մեկն ավելի ուշ մահացել է։