Հայաստանի բոլոր ներկայացուցիչները հաղթանակով մեկնարկեցին Աշխարհի գավաթում

Երեկ Սոչիում տեղի ունեցան շախմատի աշխարհի տղամարդկանց և կանանց գավաթի խաղարկության առաջին փուլի առաջին պարտիաները։ Հայաստանի ներկայացուցիչներ Էլինա Դանիելյանը, Հովհաննես Գաբուզյանը, Հայկ Մարտիրոսյանը և Շանթ Սարգսյանը առաջին պարտիաներում հաղթանակներ տոնեցին։

Աշխարհի գավաթի խաղարկությանը մասնակցում են նաև ԱՄՆ ներկայացնող մեր հայրենակիցներ Վարուժան Հակոբյանը և Սամուել Սևյանը, Բրազիլիան ներկայացնող Գրիգոր Սևակ Մխիթարյանը, Ռուսաստանը ներկայացնող Դավիթ Պառավյանը և Ռուդիկ Մակարյանը։

Սամուել Սևյանը, Դավիթ Պառավյանը և Գրիգոր Սևակ Մխիթարյանը հաղթանակներ տոնեցին, Վարուժան Հակոբյանն իր պարտիան ավարտեց հաշտությամբ, իսկ պատանի շախմատիստ Ռուդիկ Մակարյանը պարտվեց։

Այսօր կկայանան առաջին փուլի պատասխան պարտիաները։

Հայաստանի առաջատար շախմատիստներ Լևոն Արոնյանը և Գաբրիել Սարգսյանը պայքարի մեջ կմտնեն երկրորդ փուլից։ Այս մասին հայտնում է Հայաստանի շախմատի ֆեդերացիան: