«Այն ժամանակ Սրապիոնյանը Հրանուշ Հակոբյանի երեսը լվանում էր՝ ոնց կարողանում էր». Կարինե Հարությունյան

Լրագրող Կարինե Հարությունյանը ֆեյսբուքյան իր էջում գրել է. «ԵՊՀ դասախոս Սերժ Սրապիոնյանն ինձ մի կիսամյակ պարապել է: 1993-ին՝ կարծես: Նրա հետ մեկ էլ շփվել եմ 2015-ին, երբ աշխատում էի «Ազատամարտ» կայքում: Սրապիոնյանը հարցազրույց է տվել ու փրփրաբերան քննադատել Արայիկ Հարությունյանին, ավելին՝ վիրավորել է՝ նրան համեմատելով Նազիմ բեյի հետ, որը մեծ դերակատարություն է ունեցել հայերի տեղահանության, ջարդերի ժամանակ:
Դասախոսը նաև ասել է. «Նախարարի պաշտոնը զբաղեցնող մարդուն թվում է, թե նախարարության բյուջեի փողերն իր հոր տնից է բերել, ի՛ր փողն է, կարող է մսխել այնպես, ինչպես ցանկացած անառակ որդի կարող է մսխել իր հոր փողերը։ Այնինչ՝ սա մե՛ր երկրի ունեցվածքն է, և այդ բյուջեն որոշակի մասով էլ տալիս եմ ես»:
Գանք 2015-ին, երբ Սրապիոնյանը սփյուռքի փոխնախարար էր ու զանգել էր խմբագրություն՝ համոզելու, որ նախարարությունը, այնուամենայնիվ, աշխատում է, և լավ կլինի, որ գնամ, փաստաթղթերը տեսնեմ ու համոզվեմ: Իսկ զանգի պատճառը իմ՝ երկու քննադատական հոդվածներն էին սիրիահայության նկատմամբ սփյուռքի նախարարության անտարբերության վերաբերյալ: Այն ժամանակ Սրապիոնյանը Հրանուշ Հակոբյանի երեսը լվանում էր՝ ոնց ասես, ոնց կարողանում էր: Իսկ երբ ասացի՝ չէի պատկերացնում Ձեզ այդ պաշտոնում, ասաց՝ ես էլ չէի պատկերացնում: Բայց, փաստորեն, լավ էլ պատկերացրել ու աշխատել է, և նույն Հրանուշ Հակոբյանի հետ կրում է այն բոլոր մսխումների, անհաջող ծրագրերի, անգործունակության պատասխանատվությունը, որը թույլ է տվել Հակոբյանը իր պաշտոնավարման ընթացքում: Այն ժամանակ, չգիտես՝ ինչու, Սերժ Սրապիոնյանին չէր հետաքրքրում, թե ուր էին գնում նախարարության փողերը, թե երկրի բյուջեն ով ինչպես էր լափում, թե ինչ հայատյաց քաղաքականություն էր վարում իր անվանակից Սարգսյանը: Ի դեպ՝ Սերժ Սրապիոնյանը այսպես փրփրաբերան չէր խոսում նաև 2016-ին, ընդհանրապես ծպտուն չհանեց, երբ իր գործընկեր Արծրուն Ավագյանը հայտարարեց, թե դեմ չէ, որ ռուսերենը դառնա երկրորդ պետական լեզու»: