Հարցեր՝ ուսուցչի նվազագույն աշխատավարձի վերաբերյալ. պատասխանում է ԿԳՄՍ խոսնակը

ՀՀ կրթության, գիտության, մշակույթի և սպորտի նախարարի մամուլի խոսնակ Անժելա Կժդրյանը «Դուք հարցնում եք, մենք պատասխանում ենք» ձևաչափով մի քանի պարզաբանում է ներկայացրել ուսուցիչների աշխատավարձերի վերաբերյալ: Ըստ այդմ՝ հարցին, թե ուսուցչի նվազագույն աշխատավարձը տարածվո՞ւմ է դպրոցի վարչական և մանկավարժական բոլոր աշխատողների վրա (տնօրեն, փոխտնօրեն, գրադարանավար, հոգեբան և այլն), և ի՞նչ ծանրաբեռնվածության համար է այն հաշվարկված, խոսնակը պատասխանել է.

«Ուսուցչի նվազագույն աշխատավարձի երաշխավորված չափը տարածվում է բացառապես հանրակրթական դպրոցներում դասավանդող ուսուցիչների վրա: Ուսուցչի նվազագույն աշխատավարձը մեկ դրույքի համար հունվարի 1-ից կկազմի առնվազն 108 հազար դրամ՝ հարկերը ներառյալ (այդ գումարից կկատարվի համապատասխան հարկային պահում): Նվազագույն աշխատավարձը հաշվարկված է մեկ դրույքի համար, որը կազմում է շաբաթական 22 դասաժամ:

Ուսուցչի նվազագույն աշխատավարձի բարձրացումը չի վերաբերում արհեստագործական ուսումնարանների, քոլեջների, արվեստի դպրոցների մանկավարժներին: Բարձրացում լինելու է միայն հանրակրթական դպրոցների ուսուցիչների պարագայում:

Երկրոդ հարցին՝ նվազագույն աշխատավարձից բացի՝ ուսուցչին կտրվե՞ն նաև գրավորների, աշխատանքային ստաժի, դասղեկության և նմանատիպ այլ վճարներ, Ա.Կժդրյանը պատասխանել է. «Ուսուցչի նվազագույն աշխատավարձի սահմանումը որևէ կապ չունի ուսուցչին տրվող հավելյալ վճարների հետ: Պետությունը սահմանել է մեկ դրույքի նվազագույն վարձատրության չափը, որից պակաս ուսուցիչը չի կարող վարձատրվել, իսկ հավելյալ վճարները կարող են տրվել, եթե դպրոցն ունի համապատասխան ֆինանսական միջոցներ: Հետևաբար՝ նման հարցերը պետք է հստակեցնել դպրոցի տնօրենի և կառավարման խորհրդի հետ»: