«Կարողացա հաղթել կամային որակներիս շնորհիվ»․ Հովհաննես Բաչկով

Մինսկում կայացած Եվրոպական խաղերի բռնցքամարտի մրցաշարում Հայաստանը ներկայացնող 64 կգ քաշային Հովհաննես Բաչկովը, եզրափակչում 3։2 հաշվով հաղթելով Ֆրանսիայի ներկայացուցիչ Սոֆիան Ումիային, դարձավ Եվրոպական խաղերի հաղթող՝ միաժամանակ հռչակվելով նաև Եվրոպայի չեմպիոն:

Հայրենիք վերադառնալուց հետո նա ամփոփեց իր մրցելույթը․ «Ուրախ եմ, քանի որ կարողացա կրկնել 2017-իս հաջողությունը։ Հպարտ եմ։ Եզրափակչում մենամարտում էի աշխարհի գործող չեմպիոն և օլիմպիական խաղերի արծաթե մեդալակրի հետ։ Բավականին լուրջ բռնցքամարտիկ է, ով շատ զարգացած է տեխնիկապես։ Նրան կարողացա հաղթել կամային որակներիս շնորհիվ։ Այս հաղթանակը մի նոր, մեծ քայլ է դեպի նորանոր հաջողություններ ու մեդալներ։ Գնացել էինք միայն հաղթանակների համար։ Եղավ այն, ինչ ծրագրել էինք։ Հաղթանակը դժվար է տրվել, ու ուրախ եմ այդ հաղթանակի համար, քանի որ կամային որակների շնորհիվ կարողացա կորզել։

Հաղթանակիս գրավակա՞նը։ Գյումրեցիների ապրելակերպից է գալիս։ Գյումրեցուն ի ծնե սովորեցնում են, որ պետք է պայքարես ինչ-որ բանի հասնելու համար, դրա համար էլ պայքարում ենք, որ հասնենք։ Հիմա պայքարելու եմ աշխարհի առաջնության ոսկե մեդալի և Տոկիոյի օլիմպիական խաղերի ուղեգրի համար»։