Ճապոնիայի նոր կայսրը ստանձնում է գահը

Չորեքշաբթի օրը թագաժառանգ Նարուհիթոն պաշտոնապես օծվեց որպես Ճապոնիայի կայսր: Այս մասին հաղորդում է Reuters-ը:

«Վեհության զգացումով եմ լցվում, երբ մտածում եմ ստանձնածս կարևոր պատասխանատվության մասին», ասել է Նարուհիթոն: Նորընտիր կայսրը խոստացել է գործել Ճապոնիայի սահմանադրության համաձայն, նպաստել ճապոնացիների միասնությանն ու աշխարհում խաղաղության պահպանմանը:

Նշենք, որ Ճապոնիայի 85-ամյա կայսր Աքիհիթոն ապրիլի 30-ին պաշտոնապես հրաժարվեց գահից: Նա դեռ 2016 թվականին է հայտնել գահակալությունն ավարտելու իր ցանկության մասին: Աքիհիթոյին փոխարինելու է նրա 59-ամյա որդին՝ թագաժառանգ Նարուհիթոն: Սա վերջին երկու հարյուրամյակների ընթացքում գահակալի առաջին հրաժարականն է Ճապոնիայում: