ԱՄՆ Կոնգրեսը Թրամփին կոչ է արել պատասխանատվության ենթարկել Պուտինին

ԱՄՆ-ը պետք է աջակցի Ուկրաինային՝ կապված Ազովի ծովում Ռուսաստանի կողմից միջազգային իրավունքի բացահայտ խախտման հետ: Այս մասին հայտարարել է ԱՄՆ Կոնգրեսի ներկայացուցիչների պալատի անդամ Բրայան Ֆիցպատրիկը, փոխանցում է Eurointegration-ը:

«Ազովի ծովում Ռուսաստանի կողմից միջազգային իրավունքի բացահայտ խախտումն ու սադրիչ գործողություններն անընդունելի են: Ռուսաստանը պետք է վերականգնի Կերչի նեղուցով ազատ տեղաշարժը, որպեսզի ուկրաինական նավերն ազատ օգտագործեն ուկրաինական նավահանգիստները»,- ասվում է կոնգրեսականի տարածած հայտարարության մեջ:

Ֆիցպատրիկը նշել է, որ Մոսկվայի ագրեսիան ուղիղ սպառնալիք է ներկայացնում ԱՄՆ-ի ազգային անվտանգության շահերին:

«Կոչ եմ անում նախագահին և նրա վարչակազմին պատասխանատվության ենթարկել Վլադիմիր Պուտինին հաջորդ շաբաթ G20-ի գագաթնաժողովի ժամանակ»,- հավելել է կոնգրեսականը:

Նոյեմբերի 25-ին Սև ծովում, Կերչի նեղուցում Ռուսաստանի ուժերը հարձակվել են ուկրաինական 3 ռազմանավի վրա: Ուկրաինական կողմը նշում է, որ Ռուսաստանի ուժերը կրակ են բացել, ինչի հետևանքով ուկրաինացի վեց զինվորական է վիրավորվել: ՄԱԿ-ի ԱԽ-ն իրավիճակի սրման ֆոնին արտակարգ նիստ կհրավիրի: