Ուկրաինան հարվածել է Ռուսաստանում զրահաբաճկոնների համար կարևոր բաղադրիչ արտադրող միակ գործարանին

Գիշերը ուկրաիանական անօդաչու թռչող սարքերը հարձակվել են Բաշկորտոստանում գտնվող քիմիական գործարանի վրա, որը Ռուսաստանում զրահաբաճկոնների համար անհրաժեշտ բաղադրիչի միակ արտադրողն է։ Այս մասին հայտնում է РБК-Украина-ն՝ հղում կատարելով OSINT մոնիթորինգային ալիքներին։

Նշվում է, որ հարձակումից հետո ծուխ է բարձրացել Ստերլիտամակ քաղաքում բաշկիրական սոդայի ընկերության տարածքի մոտ։ Միայն այդ գործարանում են Ռուսաստանում արտադրում տերեֆտալոիլքլորիդ։ Այս քիմիական միացությունն օգտագործվում է սինթետիկ բալիստիկ մանրաթելերի, ամուր պոլիմերների և արամիդային նյութերի արտադրության մեջ։ Դրանք անհրաժեշտ են ժամանակակից զրահաբաճկոնների, սաղավարտների, ինչպես նաև ռազմական տեխնիկայի և ավիացիայի պաշտպանիչ բաղադրիչների արտադրության համար։