Ռուսական ուժերն այս տարի 400 անգամ հարվածել են Ուկրաինայի նավթագազային օբյեկտներին

Վերջին օրերին գերմանական Kromberg & Schubert ընկերությունը փակել է իր երկու գործարաններն Ուկրաինայում, որոնք լրջորեն վնասվել էին ռուսական ավիահարվածներից, հաղորդում է BBC-ն։

Բաց աղբյուրների համաձայն՝ Kromberg & Schubert-ի ուկրաինական դուստր ձեռնարկությունները, ինչպես ամբողջ խումբը, արտադրել են էլեկտրական բաղադրիչներ գերմանական խոշոր ավտոարտադրողների մեքենաների համար։ Ժիտոմիրի մոտ գտնվող գործարանի փակման մասին սոցիալական ցանցերում գրառում է արել Ժիտոմիրի մարզային վարչակազմի ղեկավար Վիտալի Բունեչկոն։ «Սա իսկապես լուրջ հարված է Ժիտոմիրի մարզի համար. վտանգված է 3600 աշխատակիցների ճակատագիրը, ինչպես նաև միլիոնավոր գրիվնաներ հարկերի տեսքով, որոնք տարբեր մակարդակներում մուտքագրվել են բյուջեներ», - գրել է Բունեչկոն։

Օգոստոսին և սեպտեմբերին ռուսական ավիահարվածները չորս անգամ հարվածել են Kromberg & Schubert-ի Ժիտոմիրի գործարանին։ Օգոստոսի 17-ին ընկերության Լուցկի մասնաճյուղը հայտարարել է իր փակման մասին նույն պատճառներով։

Միևնույն ժամանակ, «Նաֆտոգազ Ուկրաինի»-ի գործադիր տնօրեն Սերգեյ Ֆեդորենկոն հայտնում է, որ 2026 թվականի սկզբից ի վեր ռուսական ուժերը գրեթե 400 անգամ հարվածել են Ուկրաինայի նավթագազային օբյեկտներին։ «Տարվա սկզբից խմբի ձեռնարկությունները արդեն գրեթե 400 անգամ ենթարկվել են Ռուսաստանի Դաշնության կողմից հարձակման։ Մենք ոչ միայն աշխատում ենք նրանց գործունեությունը վերսկսելու ուղղությամբ, այլև փնտրում ենք լուծումներ՝ կարևորագույն ենթակառուցվածքները հետագա հարձակումներին ավելի դիմացկուն դարձնելու համար», - հայտնել է «Նաֆտոգազ»-ի մամուլի ծառայությունը՝ հղում անելով Ֆեդորենկոյի խոսքերին Ուկրաինա-G7+ էներգետիկ բանակցությունների ժամանակ։

Չորեքշաբթի առավոտյան ռուսական ուժերը ևս մեկ նմանատիպ հարված են հասցրել՝ թիրախը Խարկովի մարզում գտնվող գազի արտադրության օբյեկտն էր։ «Ռուսները շարունակում են համակարգված կերպով հարձակվել նավթագազային ոլորտի վրա», - գրել է Ֆեդորենկոն սոցիալական ցանցերում։