«Հանցագործ է այն մարդը, ում իշխանության օրոք հանձնվում է Արցախը»․ Իվետա Տոնոյան

«Նիկոլ Փաշինյանը, անտեսելով անմեղության կանխավարկածի գաղափարը, հայտարարում է, թե Գագիկ Ծառուկյանը և այլ քաղբանտարկյալներ հանցագործներ են։ Ես, իհարկե, շատ ցավում եմ, որ ՀՀ-ում օրենքը, իրավունքի գերակայությունը, անմեղության կանխավարկածի գաղափարն ընդհանրապես Նիկոլ Փաշինյանի համար որևէ բան չեն նշանակում, բայց պետք է արձանագրենք, որ եթե երկրի ղեկավարն իրեն իրավունք է վերապահում հնչեցնել նման գնահատականներ, մենք ևս կաշկանդված չենք՝ հնչեցնելու գնահատականներ»,- այսօրվա ասուլիսի ժամանակ հայտարարել է ԲՀԿ խոսնակ Իվետա Տոնոյանը։ «Հանցագործ է այն մարդը, ում իշխանության օրոք հանձնվում է Արցախը, հանցագործ է այն մարդը, ում իշխանության օրոք ադրբեջանցին շատ հանգիստ հայտնվում է Շաքի գյուղում և բռնություն է գործադրում խաղաղ ընտանիքի նկատմամբ, հանցագործ է այն մարդը, ով կտոր-կտոր Հայաստանի տարբեր մասեր նվիրում է Ադրբեջանին, հանցագործ է այն մարդը, ում հռետորաբանության մեջ գերակշռողն ադրբեջանական և թուրքական նարատիվներն են։ Արձանագրենք այս փաստը»,- շարունակել է Տոնոյանը։