«Բուլդուզերով ուղղած ճանապարհ է, քանի՞ տարում ենք պլանավորում կառուցումը». Նիկոլ Փաշինյանը՝ Դավիթ Խուդաթյանին

Առաջարկվում է 4 մլրդ 69 մլն դրամ հատկացնել մի շարք ճանապարհների հիմնանորոգման աշխատանքներին, տեխնիկական և հեղինակային հսկողության նախագծերի ձեռքբերման աշխատանքներին, փորձաքննության ծառայությունների ձեռքբերման աշխատանքներին: Այդ մասին որոշման նախագիծը Կառավարության այսօրվա նիստում ներկայացրեց ՏԿԵ նախարար Դավիթ Խուդաթյանը:

Վարչապետ Նիկոլ Փաշինյանը թվարկեց, թե որ ճանապարհների մասին է խոսքը։ Դրանց թվում են Գյումրիից մինչև ՀՀ սահման տանող 600 մ ճանապարհահատվածի հիմնանորոգումը, ինչպես նաև Ենոքավանից դեպի Կարմիրգյուղ և Ջուջևան տանող ճանապարհի հիմնանորոգումը։ Վերջինս գրունտային է, սակայն առաջին անգամ ասֆալտապատվելու է։

«Բուլդոզերով ուղղած ճանապարհ է, քանի՞ տարում ենք պլանավորում ավարտել կառուցումը»,- դիմելով Խուդաթյանին՝ հետաքրքրվեց Փաշինյանը։

«Մինչև 4 տարի ենք նախատեսել, բայց պետք է հաշվի առենք, որ և՛ աշխատանքի ծավալն է մեծ, և՛ ֆինանսական արժեքը, խոսքը 14, 7 միլիարդ դրամի պայմանագրի մասին է»,- պատասխանեց նախարարը՝ հավելելով, որ հնարավոր է այդ ճանապարհը շահագործման հանձնվի որոշակի փուլերով։