«Մեկնարկում է մեր բողոքի փուլը․ մենք չենք հուսահատվում»․ Դավիթ Բաբայան

Արցախի ԱԳ նախարար Դավիթ Բաբայանի ուղերձը՝ Բաքվի բանտից․ «Այս վերջին 10-12 օրվա ընթացքում 2 կարևոր բան է տեղի ունեցել մեր դատավարության հետ կապված, թեև ինչպես նշել էինք, սա լոկ դատավարություն չէ մեր նկատմամբ, սա հայ ժողովրդի նկատմամբ, միջազգային իրավունքի նկատմամբ, Աստծո պատվիրանների նկատմամբ դատավարություն է։
Նախ, ամսի 18-ին մեզ ներկայացրել են վերաքննիչ դատարանի վճիռը՝ 47 հատոր ընդհանուր ծավալով։ Եվ երկրորդն այն է, որ մեր պաշտպանները ներկայացրել են վճռաբեկ բողոք՝ իրենց գլխավոր դատարան։
Վճռի 99.9 տոկոսն արտագրված է իրենց դատախազության և առաջին ատյանի դատարանի որոշումից, որևէ ձևով չի տարբերվում։ Բայց ի տարբերություն նախկին փաստաթղթերի՝ այստեղ գրաքննության են ենթարկել մեր ասածները, որոշ կարևոր բաները հանվել են, և սա համատարած է։ Մեզ մեղադրում են ինչ-որ հանցավոր միավորման անդամ լինելու մեջ, թեպետ այդ հանցավոր միավորումը նրանք չեն կարող հստակ բնութագրել՝ ինչ է դա, բայց դա Արցախն է, Հայաստանն է, հայ ժողովուրդն է ընդհանուր առմամբ։
Ես ասել եմ, եթե դա հանցավոր միավորում է, ինչո՞ւ է ձեր համազգային առաջնորդը, որը ներկայիս նախագահի հայրն է, մեր Հանրապետության հետ գործունեություն ունեցել, այսինքն՝ առնչվել է ուղղակիորեն, բանակցություններ է վարել պաշտոնապես․ այս մասը ձևափոխել են։
Ինձ մեղադրում են տնտեսական հզոր, հսկայական չարաշահումների մեջ, թեպետ երբևէ բիզնեսով չեմ զբաղվել։
Ինձ մեղադրում են, որ 1988 թվականի սեպտեմբերից մինչև 1991 թվականի սեպտեմբերի 28-ը եղել եմ ինչ-որ կոմիտեում, որը որոշումներ էր ընդունում պատերազմի մասին։ Բայց ես 1988 թվականի սեպտեմբերին 10-րդ դասարան եմ տեղափոխվել։ Սա անմակարդակ, գրաքննություն անցած մի փաստաթուղթ է։

Փաստորեն մեկնարկում է մեր բողոքի փուլը, պարզ է՝ ինչ է լինելու, բայց մեզ համար կարևոր է, որ այս ձևական ատյանը ևս մեկ անգամ անցնենք, և սա կարևոր է և՛ հետագայի, և՛ պատմության, և՛ մեր հետագա քայլերի համար։
Մենք չենք հուսահատվում, բնական է, իրավունք էլ չունենք, չենք էլ հուսահատվելու, կանգնած ենք ամուր»։