«Խուզարկությունը քարոզչական նպատակ ուներ՝ թանկարժեք իրեր վերցնելու, տեսարաններով տարածելու»․ Տաթևիկ Սողոյան

«Քոչարյան ընտանիքի բնակարանային խուզարկություններից հետո իմ մոտ այնպիսի տպավորություն է, որ խուզարկությունը ոչ թե ուներ հանցագործություն բացահայտելու կամ դրան առնչվող ինչ-որ առարկաներ առգրավելու նպատակ, այլ ուներ քարոզչական նպատակ՝ ինչ-որ թանկարժեք իրեր, առարկաներ վերցնելու և դրանք հետո տեսարաններով տարածելու՝ Քննչական կոմիտեի կողմից, ինչը չի հաջողվել»,- ասուլիսի ժամանակ ասել է փաստաբան Տաթևիկ Սողոյանը։ «Այն տեսագրությունների մասով, որոնք դեռևս չեն հրապարակվել, հորդորում եմ իրավապահ համակարգին՝ մնալ օրենքի և իրավականության սահմաններում, և մարդկանց կյանքի, բնակարանի անձեռնմխելիությունը չխախտել և չվերածել քրեադատավարական գործողությունները հանրության ինչ-որ ակնկալիքները բավարարող շոուների։ Բայց եթե դրանք անգամ հրապարակվեն՝ վստահեցնում եմ, որ շատ ծիծաղելի են լինելու, որովհետև շատ ծիծաղելի է մարդկանց հարսանեկան նվերները, կամ տատիկներից, պապիկներից ստացած ինչ-որ ոսկյա հուշ վերցնել և անունը դնել, որ մենք ենթադրյալ փողերի լվացման դեպքով ինչ-որ առարկա ենք առգարվել. լուրջ չէ»,- շարունակեց փաստաբանը։