«Հայաստանի քաղաքական դաշտը վերաձևավորվում է»․ Վահան Բաբայան

Ռեֆորմիստների կուսակցության նախագահ Վահան Բաբայանի ֆեյսբուքյան գրառումը․ «Հայաստանի քաղաքական դաշտը վերաձևավորվում է․ ո՞վ կհայտնվի առաջին գծում.
Հունիսի 7-ի ընտրությունների արդյունքները Նիկոլ Փաշինյանին տվեցին իշխանությունը պահպանելու հնարավորություն։ Բայց ընտրություններում հաղթելը դեռ չի նշանակում, որ քաղաքական պայքարը ավարտված է։
Ընդհակառակը՝ հենց ընտրություններից հետո է սկսվում ամենակարևոր փուլը։
Իշխանությունը հիմա պետք է ոչ միայն կառավարի երկիրը, այլև ապացուցի, որ կարող է լուծել այն խնդիրները, որոնց շուրջ տարիներ շարունակ հասարակության մեջ կուտակվել են հարցեր՝ անվտանգություն, տնտեսական զարգացում, արտագաղթ, սոցիալական խնդիրներ և Հայաստանի արտաքին քաղաքական կողմնորոշումը։
Ընդդիմության համար իրավիճակը նույնպես փոխվել է։ Նախկին ձևաչափերով իշխանությանը հակազդելու փորձերը կարող են այլևս բավարար չլինել։ Եթե ընդդիմադիր ուժերը ցանկանում են իրական քաղաքական ազդեցություն ունենալ, նրանց անհրաժեշտ է ոչ միայն քննադատել իշխանությանը, այլև հասարակությանը ներկայացնել հստակ այլընտրանքային ծրագիր և քաղաքական ապագայի տեսլական։
Ամենակարևոր հարցն այս պահին նույնիսկ այն չէ, թե ով է հաղթել հունիսի 7-ին։
Հարցն այն է՝ ինչպիսի՞ քաղաքական ուժեր են ձևավորվելու առաջիկա տարիներին, և ո՞վ է կարողանալու դառնալ հասարակության իրական այլընտրանքը»։