«Աջափնյակի մետրոյի ծրագրի համար ընկերությունների ցանկ կա, այդ թվում՝ ռուսական»․ Տիգրան Ավինյան

Աջափնյակի մետրոյի ծրագրի կառավարչի ընտրության համար արդեն ընկերությունների ցանկ է կազմվել, և դրանց թվում նաև ռուսական ընկերություններ, կան պատասխանելով «Ազատության» հարցին, հայտարարեց Երևանի քաղաքապետ Տիգրան Ավինյանը։

Ըստ Ավինյանի՝ Աջափնյակի մետրոյի ծրագրում «առաջընթաց կա»:

«Կա ցանկ՝ նախագծի կառավարման համար ընտրվելիք ընկերությունների, որոնց հրավեր է ուղարկվելու, և մրցութային տրամաբանությամբ իրենց միջից ընտրություն է կատարվելու»,- ասաց քաղաքապետը։

Նրա խոսքով՝ նախ պետք է ընտրվի ծրագրի կառավարիչը, որի ինժեներները կիրականացնեն տեխնիկական վերահսկողությունը, իսկ դրանից հետո կընտրվի մետրոյի շինարարությունն իրականացնող ընկերությունը։

«Առաջինի՝ կառավարչի մասով ցանկ ունենք, կառուցողների մասով որոշակի պատկերացումներ ունենք»,- նշեց Ավինյանը։

Ճշտող հարցին՝ հնարավո՞ր է, որ ծրագրում ռուսական կողմը ներգրավվի, քաղաքապետը հաստատեց, որ ռուսական ընկերությունները դիտարկվում են, բայց թե որ ընկերությունը կընտրվի՝ «դա ցույց կտա կյանքը»։