«Թուրքիայի և Իսրայելի միջև հարաբերությունների այս փուլը նման է դասական «անվտանգության դիլեմայի»»․ Արա Պողոսյան

Քաղաքագետ Արա Պողոսյանը ֆեյսբուքյան էջում գրել է․ «Ըստ էության Թուրքիայի և Իսրայելի միջև հարաբերությունների այս փուլը նման է դասական «անվտանգության դիլեմայի» (Security dilemma): Թեպետ շատերը համարում են սա ցուցադրական, սակայն կարծում եմ, որ Իսրայելի և Թուրքիայի միջև հարաբերությունների առկա փուլը հենց «անվտանգության դիլեմա» է, որը կարող է հանգուցալուծվել նոր ստատուս քվոյի հաստատմամբ։ Հաշվի առնելով Մերձավոր Արևելքի առանձնահատկությունները, կարելի է ասել, որ նոր ստատուս քվոն դեռ երկար ժամանակ կմնա չհաստատված, ինչը նշանակում է, որ անկայունության վիճակը կպահպանվի։
Վերջերս Հալեպի մոտակայքում ավիաբազային Իսրայելի կողմից հասցված հարվածից հետո Նեթանյահուն հայտարարել է.
??«Մենք չենք հանդուրժի թուրքական զինված ուժերի տեղակայումը հարավում։
Մենք սա ընդհանուր առմամբ հստակեցրել ենք։ Մենք տեսանք, որ Թուրքիան մտադիր էր հաստատվել Հալեպի մոտ գտնվող օդանավակայանում, և մենք ուղերձ հղեցինք։
Ուղերձը հնչեց, բայց, ըստ երևույթին, նրանք այն չլսեցին»։
Կարծում եմ, որ դիմակայությունը կողմերի միջև դեռ երկար կտևի, իսկ նոր ստատուս քվոն կհաստատի Մերձավոր Արևելքում բազմաբևեռ անվտանգային համակարգ՝ Իսրայելը իր պոտենցիալ դաշնակիցների հետ, Թուրքիան, Պակիստանը, Սաուդյան Արաբիան իրենց պոտենցիալ դաշնակիցների հետ կամ սրանք կդառնան առանձին բևեռներ՝ կապված ԱՄՆ-ի կողմից վարվող քաղաքականությունից, և Իրանը իր պոտենցիալ դաշնակիցների հետ։ Այլ դերակատարներ կարող են լինել ներգրավված, սակայն հիմնականում միջնորդավորված։
Ահա այսպիսին է Մերձավոր Արևելքը՝ բարդ, ամենատարբեր շահերով ու շահերի բախումներով...»։