Խալիլ Շիրղոլամին՝ Գագիկ Ծառուկյանի գործի մասին

«Դուք անդրադարձաք պարոն Ծառուկյանի գործին, բայց երկու հարց: ԲՀԿ առաջնորդը տարիներ շարունակ էական ներդրում է ունեցել հայ-իրանական տնտեսական հարաբերությունների զարգացման գործում ու մշտապես հանդես եկել հարաբերությունների ամրապնդման ու խորացման օգտին: Այսօր Ծառուկյանի նկատմամբ քրեական հետապնդումն իրականացվում է նաև Իրանի քաղաքացու հետ կապված մեղադրանքի միջոցով: Տեղյա՞կ եք գործի մանրամասներին, կա՞ որևէ բան, որ կուզեք փոխանցել»,- ասուլիսի ժամանակ դիմելով ՀՀ-ում Իրանի դեսպանին՝ հարցրեց լրագրողը: Խալիլ Շիրղոլամին ասաց. «Այս հարցի վերաբերյալ իմ տեսակետն արդեն ներկայացրել էի: Կողմերի մեջ ի հայտ են եկել տնտեսական ու առևտրային որոշակի տարաձայնություններ այն պրոյեկտից, որոնք նրանք նախաձեռնել են: Ցավոք, պրոյեկտը հաջողության չի հասել: Ինչպես գիտենք, բուն վեճի տարաձայնության գլխավոր թեման տնտեսական, առևտրային բիզնես ոլորտի է, որտեղ կողմերը չկարողացան արդյունքի հասնել և ունեն տարաձայնություններ: Կարծում եմ՝ որոշակի միջնորդության արդյունքում կկարողանանք հասնել նմանօրինակ խնդիրների վերացմանը»: