ԱՄՆ հարձակումներին ի պատասխան՝ ԻՀՊԿ-ն հարվածել է Բահրեյնում ու Քուվեյթում գտնվող թիրախներին

ԱՄՆ հարվածներին ի պատասխան՝ Իրանի զինված ուժերը հարձակվել են Քուվեյթում և Բահրեյնում գտնվող ամերիկյան ռազմաբազաների վրա, ասվում է Իսլամական հեղափոխության պահապանների կորպուսի (ԻՀՊԿ) հայտարարության մեջ, որը մեջբերում է Fars-ը։

«ԻՀՊԿ-ի ռազմածովային և օդատիեզերական ուժերը համատեղ գործողությամբ անօդաչու թռչող սարքերի և հրթիռների միջոցով հարվածներ են հասցրել Բահրեյնում ԱՄՆ 5-րդ նավատորմի Սալման նավահանգստում և Քուվեյթի Ալի ալ-Սալեմ ավիաբազայում գտնվող ամերիկյան 85 կարևոր ռազմական օբյեկտների, ինչպես նաև խոցել են հակառակորդի MQ-9 անօդաչու թռչող սարք»,- հայտարարել են ԻՀՊԿ-ում։

Գիշերը ԱՄՆ զինված ուժերը մի շարք հարվածներ են հասցրել Իրանին՝ ի պատասխան, ինչպես նշում են ԱՄՆ-ում, Իրանի կողմից Հորմուզի նեղուցով անցնող առևտրային նավերի վրա իրականացված հարձակումների։ Ինչպես հաղորդում է NBC-ն՝ հղում կատարելով անանուն ամերիկացի պաշտոնյայի, այդ հարվածներն ավելի լայնածավալ էին, քան նախորդները։