«Բացահայտե՛ք ընտրախախտումները, և ժողովուրդն այս թափառախմբին կվռնդի իշխանությունից»․ Վարդան Բալյան

Քաղաքական վերլուծաբան Վարդան Բալյանի ֆեյսբուքյան գրառումը․ «Հունիսի 7-ի ԱԺ ընտրությունների քվեարկության ընթացքում մասնագետի կողմից անձը հաստատող փաստաթղթի տվյալները ստեղնաշարով տեխնիկական սարքավորման մեջ ներմուծելու արդյունքում տպված քվեարկության կտրոնների ընդհանուր թիվը կազմել է 79125։ Այս բոլոր մադիկ ունեն անուն, հայրանուն, ազգանուն, հետևաբար, այս մարդկանց նույնականացման խնդիր չկա։ Քվեարկության մասնակցած մոտ 25 հազար ընտրողների ստորագրություններ բացակայում են։ Քվեարկության ամբողջ ընթացքը տեսանկարահանվել է բոլոր տեղամասերում, այսինքն՝ կարելի է ստուգել, թե այս ընտրողները երբ են քվեարկել։ Խոսքը ժամային օրինաչափության մասին չէ, բայց շատ մեծ է հավանականությունը, որ այս մարդկանց քվեարկությունը տեղի է ունեցել, երբ ընտրական ցուցակները լրացնելիս են եղել ընտրական հանձնաժողովների այն անդամները, որոնք այդ պաշտոնում չեն նշանակվել ընդդիմադիր երկու դաշինքների քվոտայով։ Պարզ ասեմ, այս ընտրություններում իշխանության օգտին խախտումներն ունեն հստակ տրամաբանություն և կատարողներ, իսկ այդ խախտումների հետքերը հստակ տեսանելի են։ Ստուգեք նշված երկու խմբերի ընտրողների 5 տոկոսի քվեարկության հանգամանքները, կստանաք անհերքելի ապացույցներ, թե ինչպես և ովքեր են կազմակերպել ու իրականացրել խախտումները։ Բացահայտեք ու վստահ եղեք, որ ժողովուրդը այդ խախտումները բացահայտողների հետ այս այլանդակության հեղինակների ամբողջ թափառախմբին կվռնդի իշխանությունից»։