«Չեմ ընդունում այն մարդկանց, ովքեր չեն ընդունում իմ հայրենիքը»․ արցախցի Արևիկ Գրիգորյան

Արցախցի Արևիկ Գրիգորյանը ֆեյսբուքյան իր էջում գրառում է կատարել՝ Թալինի համայնքապետ Տավրոս Սափեյանի հետ տեղի ունեցած միջադեպի վերաբերյալ․ «Սիրելի ֆեյսբուքյան ընկերներ, քիչ առաջ իմ տան տարածքում փորձեցին իմ կարծիքն ու մտածելակերպը իմանալ ընտրությունների հետ կապված։ Քանի որ մենք որևէ քաղաքական ուժի հետ կապ չունենք, և ինձ նաև հաճելի չէ իրենց տեսնել իմ տարածքում, ես խնդրեցի հեռանալ։ Բայց, ինչպես տեսնում եք, Թալինի համայնքապետ Տավրոս Սափեյանը պնդեց, որ պիտի մոտենա ու խոսի։ Ես ևս մեկ անգամ խնդրեցի, որ գնան, բայց նրանք մոտեցան ու սպառնալից փորձեցին ինչ-որ բան հասկացնել։
Սիրելի հայրենակիցներ, քանի որ Արցախն ու Հայաստանն իմ հայրենիքն են, ես չեմ կարող ուրանալ մեր տղերքի թափած արյունը։ Մեր տան պատից կախված հերոսների նկարները, տանը կախված Արցախի դրոշն ինձ պարտավորեցնում են, որ ես չընդունեմ այն մարդկանց իմ տարածքում, ովքեր ուրացել են, ովքեր Արցախ են նվիրել, ովքեր արժանապատվություն չունեն, ովքեր չեն ընդունում իմ հայրենիքը։
Եթե ես թույլ տամ, որ նրանք մտնեն իմ տուն, կնշանակի՝ ես ինքս արժանապատվություն չունեմ, կնշանակի դավաճանել եմ նահատակված տղաներին։
Հիմա մի բան կասեմ․ ովքեր ուզում են՝ թող թերագնահատեն, ովքեր ուզում են՝ թող վատաբանեն, բայց ես ցանկանում եմ, որ իմ երեխաները արժանապատիվ մեծանան, երբեք ու ոչնչի դիմաց չվաճառեն իրենց հայրենիքը։ Ես ցանկանում եմ արժանապատիվ Հայաստանում, հայրենիքում մեծացնել իմ երեխաներին։
Եթե պատերազմից հետո իմ հայրենիքում՝ Հայաստանում, ինձ օգնել են, դա դեռ չի նշանակում, որ ինձ կաշառել են կամ ես պարտավորվածություն ունեմ որևէ մեկի առաջ։ Ես միայն շնորհակալ եմ բոլոր նրանց, ովքեր Հայաստանցի ու Արցախցի չեն բաժանում, ովքեր ապրում են միմյանց ցավով ու ուրախանում միմյանց ուրախությամբ»։