Շենաթաղի տներից մեկի բակում դամբարաններ են հայտնաբերվել

ՀՀ ԿԳՄՍ նախարարություն Պահպանության ծառայություն ՊՈԱԿ-ը հայտնում է. «Սյունիքի մարզի Շենաթաղ գյուղի բնակելի տներից մեկի բակում իրականացվող հողաշինարարական աշխատանքների ընթացքում պատահաբար բացվել են մ.թ.ա. VII–VI դարերով թվագրվող դամբարանային կառույցներ։
Հայտնաբերման վայրում առաջնային փաստագրման և ուսումնասիրման աշխատանքներ է իրականացրել Պահպանության ծառայության հնագիտական խումբը։ Կատարված հետազոտությունների արդյունքում արձանագրվել են երեք խոշոր դամբարանախցեր, որոնք ներկայացված են ձգված ուղղանկյուն հատակագծով քարարկղային կառույցներով՝ ծածկված 6–10 խոշոր սալաքարերով։
Դամբարանների ներսում հայտնաբերվել է հարուստ նյութական մշակույթ՝ ներառյալ մեծաքանակ խեցեղեն անոթներ, ինչպես նաև մետաղյա գտածոներ՝ ուլունքահատիկներ, դաշույնների և դանակների բեկորներ, նիզակի կոթառների հատվածներ՝ պատրաստված բրոնզից և երկաթից։ Հայտնաբերված նյութերի և դամբարանային ճարտարապետության առանձնահատկություններից ենթադրվում է, որ համալիրն առնչվում է ուշ երկաթեդարյան թաղման ավանդույթներին։
Միաժամանակ, հուշարձանը պահանջում է շարունակական և երկարատև հնագիտական ուսումնասիրություն՝ համակարգված պեղումներ և նյութերի համալիր վերլուծություն, ինչը նախատեսվում է իրականացնել առաջիկայում»: