«1 միլիոն դրամ կտրամադրվի նաև մարզերում բնակվող 100 տարեկան քաղաքացիներին»․ Արսեն Թորոսյան

ՀՀ կառավարության որոշմամբ՝ 100 տարին լրացած կենսաթոշակառուներին և նպաստառուներին տրամադրվելու է 1 մլն դրամ միանվագ աջակցություն։

«ՀՀ-ում 100 տարին լրացած քաղաքացիներին 1 մլն դրամ տրամադրելու որոշումով փորձել ենք ինչ-որ չափով արդարություն մտցնել, որովհետև Երևանի ավագանու որոշումով մենք ունեինք այդ կարգավորումը Երևանի քաղաքացիների համար և մի փոքր անարդար էր դա մարզային բնակիչների համար»,- այս մասին այսօր Կառավարության նիստից հետո լրագրողների հետ զրույցում նշեց ՀՀ աշխատանքի և սոցիալական հարցերի նախարար Արսեն Թորոսյանը

«Մենք այդ հարցը լուծել ենք և հույս ունենք, որ մեր շատ քաղաքացիներ երկար կյանք կունենան՝ անկախ այս կարգավորումից»,-նշեց նախարարը։

Այս պահին 100 տարեկան և դրանից բարձր տարիք ունեցող 71 քաղաքացի կա, որոնցից 42-ը՝ մարզերում, և այս կարգավորումը, ըստ էության, մարզերում բնակվողների համար է գործելու, ինչպես նաև առաջիկայում 100 տարեկան դարձող քաղաքացիների համար։