«Պարզ հայ մարդը «մաշկով զգում է», որ Հայոց Եկեղեցին է մնացել՝ որպես իր ինքնության վերջին միջնաբերդը»․ Ռուբեն Մելիքյան

Փաստաբան Ռուբեն Մելիքյանը ֆեյսբուքյան իր էջում գրում է․ «Երեկ Մայր Աթոռ Սուրբ Էջմիածին հասա գիշերը ժամը 2-ին։ Առատ ձյուն էր գալիս, ու ճանապարհները դժվարանցանելի էին, սակայն Մայր Տաճարը, մոմավառության սրահն ու Մայր Աթոռի ճեմուղիները մարդաշատ էին, ու մարդկանց հոսքը չէր էլ դադարում։ Ինչո՞ւ:
Կարծում եմ՝ որովհետև պարզ հայ մարդը «մաշկով զգում է», որ Հայոց Եկեղեցին է մնացել՝ որպես իր ինքնության վերջին միջնաբերդը։ Որովհետև պարզ հայ մարդն ունկնդիր է Ամենայն Հայոց Հայրապետի ազդարարած պարզ ճշմարտություններին. «Ազգը զորեղ է, և պետությունը՝ անսասան, երբ անխաթար են նվիրական արժեքները, ավանդույթներն ու նախնյաց ժառանգությունը, երբ որևէ պատրվակով չի ձևախեղվում պատմական հիշողությունը, կասկածի տակ դրվում մեր Սուրբ Եկեղեցու բազմադարյա առաքելությունը»։
Իսկ ի՞նչ է լսում պարզ հայ մարդը նիկոլադավանների ճամբարից։ Լսում է, որ մեր նախնյաց ժառանգությունն անարժեք է ու անպիտան, որ պետք է «անջատել» մեր պատմական հիշողությունը, «զեղչել» մեր ավանդույթը, մոռանալ մեր առաքելությունը։ Լսում է ու չի ընդունում։ Չի ընդունում, ու կենսական «բնազդով» հայացքն ուղղում է այնտեղ, որտեղ ինքն ունի ինքնություն ու արժեքավորություն»։