«Անհավասարությունը բխում է սոցիալական շերտավորումից, որի անմիջական պատասխանատուն դո՛ւ ես»․ Արեգ Սավգուլյան

ՀՀ աշխատանքի և սոցիալական հարցերի նախարարի նախկին խորհրդական Արեգ Սավգուլյանի ֆեյսբուքյան գրառումը․ «Սոցիալական անհավասրաություն. ՀՀ բնակչության 23.6 %-ը (709.000 քաղաքացի) աղքատ է և դուք խոստացել էիք այս թիվը կրճատել 2 անգամ ձեր 5 ամյա ծրագրում, որն ընդունել եք 2021թ.։ Եվ սա ես չեմ ասում, այլ վարչապետը (27.10.2025թ.), որը գտնում է նաև, որ դրա հիմնական պատճառը ավերված դպրոցներն են։ Եթե աղքատության մակարդակի նվազեցման ձեր փիլիսոփայությունը սա է, պարզ է թե ինչո՞ւ ոչինչ չեք արել, որովհետև ուղիղ մեկ տարի առաջ էլ խոստովանեցիք, որ «մենք դպրոց չենք կարողանում կառուցել»։ Այսինքն՝ այս երկաթյա կուռ տրամաբանությամբ դուք երբեք չեք հաղթահարի աղքատությունը։
Բեռլինում հայտարարեցիր, որ պատմությունը սկսում եք նոր էջից, որովհետև չեք ուզում նորից կրկնել այն, ուզում եք ստեղծել ավելի բարեկեցիկ և խաղաղ պատմություն։ 700.000․ ՀՀ քաղաքացիների «աղքատության իրավունքի» պաշտպանության, Հայրենիքի կորստի, պետական պարտքի բազմապատկման մասին է իրական հայաստանի ձեր պատմությունը։
Ի լուր աշխարհի հայտնում ես, որ չգիտես թե Հայ Առաքելական եկեղեցին որտեղից է ֆինանսավորվում ( բայց գիտես, որ կաթողիկոսը ինչ-որ ավագ լեյտենանտի է զեկուցում), եկեղեցիականների մեջ սոցիալական սուր շերտավորում է առկա, և քո առաքելությունդ դրա դեմ պայքարելն է։ Իսկ չե՞ս մտածել, որ այդ անհավասարությունը բխում է նաև մեր հասարակության ծայրահեղ սոցիալական շերտավորումից, որի անմիջական պատասխանատուն դո՛ւ ես։
Հ.Գ. Եթե դու Հայ առաքելական եկեղեցու հետևորդ ես, ի՞նչ գործ ունի «Կյանքի խոսք»-ի հովվապետը քո հետ միասին պատարագներում։ Հասկացա, սա էլ եկեղեցու պատմությունը 0-ից սկսելու միջոց է, իսկ մենք Արցախի օրինակով քաջ գիտենք, թե ի՞նչ է լինում, երբ դու սկսում ես քո կետից՝ զրոյից»։