«Այս գործով ոչ մի ապացույց չի ներկայացվել, ոչ մի տուժող չկա». Էդգար Ղազարյան

Երևանի ընդհանուր իրավասության դատարանի «Կենտրոն» նստավայրում այսօր կայացել է հասարակական, քաղաքական գործիչ Էդգար Ղազարյանի գործով հերթական դատական նիստը:

Լրագրողների հետ զրույցում Էդգար Ղազարյանը նշել է, որ հանրային մեղադրողը նույն տեսանյութը որպես չորս ապացույց է ներկայացրել: «Դա խոսում է իրենց աշխատելու որակի մասին: Բազմաթիվ հղումներ չէին բացվում առհասարակ․․․

Այս գործում կա ընդամենը մեկ վկա, ոչ մի տուժող չկա, ոչ մի փորձագետի եզրակացություն չկա: Այսինքն՝ ինքը պետք է ապացուցի, որ այդ ասվածը նախ տեղեկություն է, երկրորդը՝ արատավորող տեղեկություն է, որից որևէ մեկը տուժել է»,- ընդգծել է Ղազարյանը:

«Իմ ելույթը բերել և դատարանում ներկայացնում են որպես ապացույց. դա իմ ելույթն է: Ապացույցը պետք է լինի ապացուցելը, որ այդ ելույթը պարունակում է դատավորի հասցեին արատավորող տեղեկություն: Այդպիսի ոչ մի ապացույց հանրային մեղադրողը չի ներկայացրել: Ապացույց գոյություն չունի»,- նշել է Ղազարյանը և հավելել, որ դեռ այս գործում միջնորդություններ ունի դատարանին ներկայացնելու:

Հիշեցնենք, որ Էդգար Ղազարյանին մեղադրանք է առաջադրվել Սահմանադրական դատարանի դատավորներին արատավորող, նրանց իրավունքներին ու օրինական շահերին վնաս պատճառող տեղեկություններ հրապարակելու համար։