«Ինչպե՞ս է հնարավոր, որ շիրմաքարը երեք անգամ վնասվի»․ զոհվածի մայր

44-օրյա պատերազմում զոհված Ազատ Մաջարյանի մայրը՝ Նարինե Գրիգորյանը «Եռաբլուր» զինվորական պանթեոնում լրագրողներին ցույց է տվել որդու վնասված շիրմաքարը․ «2021-ի գարնանը քարը դրեցին, անցավ տասը օր, եկա, տեսա նկարը գունաթափված է։ Քարը հանեցին, տարան։ Չգիտեմ՝ քարը փոխեցին, թե նկարը, ասացին՝ նորմալ է արդեն։ Անցավ ժամանակ, գամ, տեսնեմ՝ քարի կողքերն է կոտրված։ Զանգում եմ պանթեոնի պատասխանատուներին, ասում՝ տեսե՞լ եք։ Մի երկու ամիս էլ դրա համար պայքարեցի, որ կոտրված տեղը տաշեն։ Անցած տարի օգոտոսին զանգեցի, ասացի՝ քարը ճաքած է, ասացին՝ անորակ քարեր են դրվել։ Ասացի՝ գոնե մինչև հոկտեմբեր կհասցնե՞ք, ասացին՝ անպայման, բայց չհասցրեցին ու խոստացան մինչև դեկտեմբեր քարը փոխել նորով։ Սպասեցի ու էլի զանգեցի, ասացին՝ տենդերը շահող չկա։ Հունվարից հետո ինձ ոչ մեկը չպատասխանեց․․․ Մարտից Եռաբլուրի անձնակազմը գցում է ՊՆ-ի վրա, նա՝ նրա։ Ասացին՝ մինչև հուլիսի 15-ը քարը կփոխվի, բան չմնաց, բայց դեռ ոչինչ չեն արել»,- հայտնեց զոհված զինծառայողի մայրը։