Վրաերթի ենթարկված կինը մահացել է

Այսօր՝ հունիսի 18-ին, մահվան ելքով վրաերթ է տեղի ունեցել Երևանում: Ժամը 16:50-ի սահմաններում Արագածոտնի մարզի բնակիչ 26-ամյա Հենրիկ Գ-ն իր վարած «Ford Transit» մակնիշի ավտոմեքենայով Սեբաստիա փողոցում՝ Մալաթիա-Սեբաստիա վարչական շրջանի ղեկավարի աշխատակազմի վարչական շենքի հարևանությամբ վրաերթի է ենթարկել Երևանի բնակիչ 73-ամյա Ռուզան Հ-ին: Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը փախուստի չի դիմել, ահազանգել է շտապօգնություն և օպերատիվորեն ժամանած Երևանի 1-03 շտապօգնության բժիշկների հերթապահ խումբը վիրավորին ծայրահեղ ծանր վիճակում տեղափոխել է «Աստղիկ» բժշկական կենտրոն:

Վրաերթի հետևանքով ավտոմեքենան դուրս է եկել երթևեկելի գոտուց և հայտնվել հետիոտնի համար նախատեսված մայթին:

Կարճ ժամանակ անց հիվանդանոցից ահազանգ է ստացվել ոստիկանության Մալաթիայի բաժին, որ վիրավորը գիտակցության չգալով մահացել է: Դեպքի փաստով քննչական բաժնում նախաձեռվել է քրեական վարույթ: Քննիչի հանձնարարականով՝ ավտոմեքենան տեղափոխվում է ՊԾ Երևան քաղաքի գնդի պահպանվող հատուկ տարածք: Ֆոտոլրագրողը հայտնում է, որ պարեկներն ու ոստիկանները դեպքի վայրում հայտնաբերել են «Honda Accord» մակնիշի ավտոմեքենա, որի վարորդը կասկածվում է «Ford Transit»-ի վարորդի համար վթարային իրավիճակ ստեղծելու մեջ: Նշված ավտոմեքենան նույնպես քննիչի հանձնարարականով տեղափոխվել է ՊԾ Երևան քաղաքի գնդի պահպանվող հատուկ տարածք: