Թրամփը վետո է դրել Խամենեիին սպանելու` Իսրայելի ծրագրի վրա. Reuters

ԱՄՆ-ի նախագահ Դոնալդ Թրամփը վերջին օրերին «վետո» է դրել Իրանի գերագույն առաջնորդ այաթոլլա Ալի Խամենեիին սպանելու՝ Իսրայելի ծրագրի վրա, հաղորդում է Reuters-ը՝ հղում անելով երկու ամերիկացի պաշտոնյաների։
Գործակալության տվյալներով՝ աղբյուրներից մեկը հայտնել է, որ դեռևս խոսք չկա Իրանի քաղաքական ղեկավարությանը հետապնդելու մասին։

Հիշեցնենք, որ հունիսի 13-ի գիշերը Իսրայելի պաշտպանության ուժերը (IDF) սկսել են «Վերելք առյուծ» անվամբ լայնածավալ գործողություն, որի շրջանակներում ռազմաօդային ուժերը հարվածներ են հասցրել Իրանի միջուկային ծրագրի ռազմական թիրախներին և վայրերին։ Իսրայելի ռազմաօդային ուժերը մի քանի հարձակումներ են իրականացրել Իրանի տարբեր մասերում, այդ թվում՝ Թեհրանում, որտեղ սպանվել են իրանցի մի քանի բարձրաստիճան զինվորականներ, այդ թվում՝ Իրանի զինված ուժերի գլխավոր շտաբի պետը և Իսլամական հեղափոխության պահապանների կորպուսի (IRGC) հրամանատարը, ինչպես նաև մի շարք միջուկային գիտնականներ։ Հարվածներ են հասցվել նաև երկրի մի քանի միջուկային օբյեկտների, այդ թվում՝ Նաթանզի և Ֆորդոյի, ինչպես նաև երկրի տարբեր մասերում գտնվող իրանական ռազմական դիրքերի վրա։ Իրանի գերագույն առաջնորդ այաթոլլա Ալի Խամենեին քաղաքացիներին ուղղված իր ուղերձում Իսրայելի կողմից Իրանի վրա հարվածները որակել է որպես հանցագործություն՝ ասելով, որ Իսրայելը կբախվի «դառը և սարսափելի ճակատագրի»։
Իսլամական հեղափոխության պահապանների կորպուսը հայտարարել է, որ Իսլամական Հանրապետությունն սկսել է «Ճշմարիտ խոստում 3» գործողությունը՝ ի պատասխան Իսրայելի հարվածների։